Форумның мақсаты мен маңыздылығы

Форумның басты мақсаты – Түркістанды түркі елдері арасындағы мәдени және рухани орталық ретінде таныту, оның туристік тартымдылығын арттыру және халықаралық байланыстарды нығайту. Жиын барысында сарапшылар мен сала мамандары қаланың туристік инфрақұрылымын жақсарту, жаңа жобаларды жүзеге асыру және аймақтың туризм саласындағы мүмкіндіктерін кеңейту мәселелерін талқылады.

Түркістанның жаңа мүмкіндіктері

Түркістан облысы әкімінің бірінші орынбасары Зұлпыхар Жолдасов өңірдің тарихи маңыздылығына тоқталып, туризмді дамытуға қатысты жоспарларымен бөлісті. Оның айтуынша, Түркістанның Қазақстан экономикасындағы рөлі артып келеді, ал туризм бұл дамудың негізгі бағыттарының бірі болмақ.

«Түркістан – тек Қазақстан үшін ғана емес, бүкіл түркі әлемі үшін ерекше орын. Қалаға арнайы мәртебе беру туралы заңның қабылдануымен бірге туристер мен инвесторлар үшін жаңа мүмкіндіктер ашылады. Біздің басты мақсатымыз – Түркістанды аймақтық және халықаралық деңгейдегі туристік орталыққа айналдыру,» – деді Жолдасов.

Форум аясында Түркістан қаласының әкімі Әзімбек Пазылбек «Түркістанға арнайы мәртебе беру: жаңа перспективалар мен даму мүмкіндіктері» тақырыбында баяндама жасады. Сондай-ақ, Еуразия туризм қауымдастығының төрайымы Рысты Қарабаева Қытайдан туристер тарту стратегиялары туралы ой бөліссе, туризм басқармасының басшысы Нұрдәулет Медеуов аймақтың туристік әлеуетін арттыру жолдарын ұсынды.

Жаңа инвестициялар және инфрақұрылымдық жобалар

Түркістанның туризм саласын дамыту мақсатында бірнеше ауқымды жоба жүзеге асырылуда. 2024 жылы өңірге 79,2 миллиард теңге инвестиция тартылып, бұл көрсеткіш өткен жылмен салыстырғанда 48%-ға артты. Қазіргі таңда «Қолөнершілер қалашығы», «Күлтөбе» тарихи кешені, «Arena Aquatica Turkestan» ойын-сауық орталығы, «Yassy Hall and Apartment», «Platinum» қонақ үйлері сынды бірқатар маңызды жобалар іске қосылуда.

Сонымен қатар, Түркістанда ірі су паркі мен бес жұлдызды қонақ үй салу жоспарланған. Бұл инфрақұрылымдық өзгерістер туристер үшін жайлы жағдай жасаумен қатар, аймақтың экономикалық әлеуетін де арттырады.

Түркістан – Түркі әлемінің туризм астанасы

2024 жылы Түркістан «Түркі әлемінің туризм астанасы» мәртебесіне ие болды. Бұл статус қаланың халықаралық деңгейде танылуына және туристер ағынының артуына ықпал етуде. Ал 2025 жылы Түркістанға арнайы мәртебе беру туралы заң күшіне енген соң, қала қарқынды дамып, әлемдік туризм картасындағы орнын одан әрі нығайта түседі деп күтілуде.

Осылайша, Түркістан – тек тарихи-мәдени мұра ғана емес, Қазақстан мен бүкіл түркі халықтары үшін маңызды туристік орталыққа айналуда.

Ахмет АТАК